പ്രലോഭനങ്ങളെ അതിജീവിക്കാൻ...

Shalom Times, 02 July 2013

പാർസികളുടെ ഇടയിൽ നിലനിന്നിരുന്ന ഒരു ആചാരമുണ്ട്. അവർ യുദ്ധത്തിൽ ശത്രുക്കളെ കീഴടക്കിക്കഴിയുമ്പോൾ അനേകരെ തടവിലാക്കും. ഇങ്ങനെ തടവിലാക്കപ്പെട്ടിരിക്കുന്നവരെ അവർ വളരെ നാളത്തേക്ക് സൂക്ഷിക്കും. പാർസികളുടെ ആഘോഷം വരുമ്പോൾ അവരിൽ വളരെ സുമുഖരെന്നു തോന്നുന്ന തടവുപുള്ളികളെ ഓരോരുത്തരെ മോചിപ്പിക്കും. മാത്രമല്ല രാജകീയ വസ്ത്രങ്ങളും സുഭിക്ഷമായ ഭക്ഷണവും സകല ആസ്വാദനങ്ങൾക്കുമുള്ള വഴികളും അവർക്ക് നല്കും. പറഞ്ഞറിയിക്കാൻ വയ്യാത്തവിധം അവരെ സന്തോഷിപ്പിക്കാൻ അവർ ശ്രമിക്കും. ശേഷം പ്രധാന ആഘോഷദിവസം ഈ തടവുപുള്ളിയെ ആഘോഷമായി കൊണ്ടുവന്ന് എല്ലാവരും കാൺകെ വധിക്കും. കാര്യങ്ങൾ അറിഞ്ഞപ്പോൾ തടവുപുള്ളികൾക്ക് അപ്രകാരം സന്തോഷത്തിനായി തിരഞ്ഞെടുക്കപ്പെടുന്നതിൽ വേദനയായി. ജയിലിലെ ദുരിതമായിരുന്നു പുറത്തുള്ള കുറച്ചുദിവസത്തെ ആസ്വാദനത്തെക്കാൾ അവർക്കിഷ്ടം. വരാൻ പോകുന്ന ആഘോഷവും തീറ്റയും കുടിയും രാജകീയ വസ്ത്രങ്ങളും അവരിൽ പേടിയുളവാക്കിത്തുടങ്ങി. ആഘോഷവും ഭക്ഷണവും സന്തോഷവുമൊക്കെ അങ്ങനെ അവരിൽ ഭയവും ഉത്ക്കണ്ഠയും വളർത്തി
യിരുന്നു.

ജീവിതാവസാനം മുന്നിൽക്കാണുമ്പോൾ ഈ ലോകത്തിലെ സുഖസന്തോഷങ്ങൾ നമ്മെ തെല്ലും പ്രലോഭിപ്പിക്കില്ല. അല്പം കഴിഞ്ഞ് മരിക്കുമെന്നുറപ്പുണ്ടെങ്കിൽ അതിനു മുൻപ് ലൗകിക സന്തോഷത്തിന് പിന്നാലെ പോകുവാൻ നമുക്കാവില്ല. നിരന്തരം ജീവിതാന്ത്യത്തെക്കുറിച്ച് ധ്യാനിച്ചാൽ നമുക്ക് ഈ ലോകത്തെയും അതിന്റെ മായയായ പ്രലോഭനങ്ങളെയും അതിജീവിക്കാൻ സാധിക്കും.