ചാവറയച്ചൻ വിശുദ്ധ പദവിയിലേക്ക്

Sunday Shalom, 04 October 2013
Written by  റോയി പാലാട്ടി സി.എം.ഐ 

റോം: വാഴ്ത്തപ്പെട്ട ചാവറയച്ചനെ വിശുദ്ധനായി ഉയർത്തുന്നതിനുള്ള എല്ലാ നടപടികളും പൂർത്തിയായി. ഇനി ദിവസം കൂടി പ്രഖ്യാപിക്കേണ്ടതുള്ളൂ. 1986 ഫെബ്രുവരി എട്ടിനാണ് ജോൺ പോൾ രണ്ടാമൻ മാർപാപ്പ അൽഫോൻസാമ്മയോടൊപ്പം ചാവറയച്ചനെയും വാഴ്ത്തപ്പെട്ട പദവിയിലേക്ക് ഉയർത്തിയത്. തുടർന്ന് ചാവറയച്ചന്റെ മധ്യസ്ഥതയിലുള്ള ഒരു അത്ഭുതം കൂടി ആവശ്യമായിരുന്നു വിശുദ്ധനായി നാമകരണം ചെയ്യാൻ. സഭ മുഴുവൻ ഇതിനായുള്ള പ്രാർത്ഥനയിലായിരുന്നു ഈ നാളുകളിൽ. ഇന്നിതാ രണ്ടാമത് ഒരു അത്ഭുതം കൂടി റോം സ്ഥിരീകരിച്ചൂ. ഒരു മെഡിക്കൽ ഡോക്ടർ പഠനവിഷയമാക്കി കേസ് അംഗീകരിച്ചിരുന്നെങ്കിലും മറ്റൊരാളുകൂടി രോഗശാന്തി സ്ഥിരീകരിക്കേണ്ടിയിരുന്നു. നാമകരണ നടപടികൾക്കായുള്ള കോൺഗ്രിഗേഷന്റെ പ്രീഫെക്ട് കാർഡിനൽ ആഞ്ജലോ അമാത്തോയാണ് സി.എം. ഐ സഭയുടെ പൊതുകാര്യാലയത്തിൽ ഇക്കാര്യം അറിയിച്ചത്. പാലായിൽ നിന്നുള്ള ഒരു കുട്ടിയുടെ രൂപരഹിതമായ കണ്ണുകൾ സൗഖ്യമായതാണ് നാമകരണ നടപടികളുടെ ദ്രുതഗതിയിലുള്ള നടത്തിപ്പിന് നിദാനമായത്.

1805 ഫെബ്രുവരി പത്തിന് കുര്യാക്കോസ് മറിയം ദമ്പതികളുടെ ആറു മക്കളിൽ ഇളയവനായി കുര്യാക്കോസ് കൈനകരിയിലെ ചാവറയിൽ ജനിച്ചു. 24-ാം വയസിൽ 1829 നവംബർ 29-ന് വൈദികപട്ടം സ്വീകരിച്ചു. അന്ന് ഇടവക വൈദികനായിരുന്ന പാലയ്ക്കലച്ചൻ, പോരൂക്കരയച്ചൻ എന്നിവരോട് ചേർന്ന് വാഴ്ത്തപ്പെട്ട ചാവറയച്ചൻ മാന്നാനംകുന്നിൽ ഭാരതത്തിലെ ആദ്യ ഏതദ്ദേശീയ സന്യാസ സഭയായ സി.എം.ഐ സഭയ്ക്ക് തുടക്കമിട്ടു. 1831 മെയ് 11-ന്.

പത്തൊമ്പതാം നൂറ്റാണ്ടിലെ കേരള സഭയ്ക്ക് ആത്മീയവും ബൗദ്ധികവും സാമൂഹികവുമായ മേഖലകളിൽ ചാവറയച്ചൻ വഹിച്ച പങ്ക് അവിസ്മരണീയമാണ്. സീറോ മലബാർ സഭയിലെ ആദ്യ മേജർ സെമിനാരിയുടെ സ്ഥാപനം മുതൽ വാഴ്ത്തപ്പെട്ട ചാവറയച്ചനിലൂടെ കേരള സഭയ്ക്ക് ലഭിച്ച സേവനങ്ങൾക്കു കണക്കില്ല.

1871 ജനുവരി മൂന്നിന് ഭാഗ്യമരണം പ്രാപിക്കും വരെ ദൈവതിരുമുമ്പിൽ വിശ്വസ്തനായ ഈ പുണ്യപുരുഷനെ ആഗോള സഭ പൊതുവണക്കത്തിനായി ഉയർത്തുകയാണ്.
കേരള സഭയുടെ ചരിത്രത്തിലെ ഒരു നാഴികക്കല്ലുകൂടിയാകും ഈ വിശുദ്ധ പദവി പ്രഖ്യാപനം. 2014 ഫെബ്രുവരിയിൽ പ്രഖ്യാപനം നടന്നേക്കും എന്നാണ് ചില അനൗദ്യോഗിക വൃത്തങ്ങളിൽ നിന്നുള്ള റിപ്പോർട്ട്. ഈ വാർത്ത അറിയുന്നതോടെ മാന്നാനംകുന്നിലേക്ക് ജനം ആവേശത്തോടെ കയറിചെല്ലാൻ കാത്തു നിൽക്കുന്നു.