മെക്‌സിക്കോയിലെ ദിവ്യകാരുണ്യാത്ഭുതം

Sunday Shalom, 23 August 2013

ജീവിക്കുന്ന ദിവ്യകാരുണ്യത്തിന്‍റെ അടയാളമായി വീണ്ടും ദിവ്യകാരുണ്യാത്ഭുതം. മെക്‌സിക്കോയിലെ ഗുഡാലാജാരയിലെ ജാലിസ്‌കോയിലാണ് ഇക്കഴിഞ്ഞ ജൂലൈ 24 ന് അത്ഭുതം അരങ്ങേറിയത്. ഇടവകയിലെ കൂദാശചെയ്ത തിരുവോസ്തിയിൽ രക്തം കട്ടപിടിച്ചതായി കണ്ടെത്തിയെന്ന് അവിടുത്തെ വികാരി ഫാ.ജോസ് ഡോളോറസ് കാസ്റ്റെലാനോസ് ഗുഡീനോ മാധ്യമങ്ങളോട് വിശദീകരിച്ചു. ഈ അത്ഭുതം മാനവരാശിയെയും പ്രത്യേകിച്ച് ക്രൈസ്തവരേയും ദിവ്യകാരുണ്യത്തിലേക്ക് അടുപ്പിക്കുന്നതിനുള്ള അടയാളമാണ്.

ഇപ്പോൾ പതിനായിരക്കണക്കിനാളുകളാണ് ഈ അത്ഭുതം ദർശിക്കുന്നതിന് ഈ ഇടവകയിലേക്ക് എത്തിക്കൊണ്ടിരിക്കുന്നത്. സഭ അംഗീകരിച്ചാൽ ഈ നൂറ്റാണ്ടിലെ ഏറ്റവും വലിയ ദിവ്യകാരുണ്യാത്ഭുതമായിരിക്കും ഇത്.

ജൂലൈ 24,ന് വികാരിയച്ചൻ ദേവാലയത്തിൽ ദിനംതോറുമുള്ള പ്രാർത്ഥനയിൽ മുഴുകിയിരിക്കുകയായിരുന്നു. പെട്ടെന്ന് അദ്ദേഹം ഒരു പ്രകാശം ദർശിച്ചു. കൂടെ, ഒരശരീരിയും. മണിമുഴക്കുക. എല്ലാവരും വരട്ടെ. എല്ലാവരെയും ദിനം മുഴുവൻ ഞാൻ അനുഗ്രഹിക്കും. ഇന്ന് നിങ്ങൾ ഒരു അത്ഭുതം ദർശിക്കും. ഈ ദിവ്യകാരുണ്യാത്ഭുതം  സ്‌നേഹത്തിന്‍റെയും നമ്മുടെ മതാവിന്റെയും പ്രതീകമായ ദിവ്യകാരുണ്യാത്ഭുതമെന്ന് വിളിക്കപ്പെടും.'' ആ അശരീരിക്കുമുമ്പിൽ അദ്ദേഹം അത്ഭുതസ്തബ്ധനായി.

മൂന്നുമണിയായപ്പോഴേക്കും ആളുകൾ പ്രാർത്ഥനക്ക് എത്തിത്തുടങ്ങി. മൂന്ന് മണിക്ക് അച്ചൻ സക്രാരി തുറന്നു. തിരുവോസ്തി ക്രിസ്തുവിന്‍റെ നാമത്തിൽ ആശീർവദിച്ചു. പെട്ടെന്ന് തിരുവോസ്തി രക്തത്താൽ നനഞ്ഞു.

ദിവ്യകാരുണ്യാത്ഭുതം തെളിയിക്കുന്നതിന് ആവശ്യമായ എല്ലാ ശാസ്ത്രീയ പരീക്ഷണങ്ങളും നടത്തുന്നതിനുള്ള തയ്യാറെടപ്പ് നടന്നുകൊണ്ടിരിക്കുന്നു. കർദിനാൾ ജോസ് ഫ്രാൻസിസ്‌കോ രോബിൾസ് ഒർട്ടേഗയുടെ നേതൃത്വത്തിൽ ഇക്കാര്യത്തിൽ കൂടുതൽ പഠനം തുടരുകയാണ്.