ഈശോയെ തള്ളിപ്പറഞ്ഞ പത്രോസ്

Sunday Shalom, 21 June 2013
Written by  വൈലറ്റ് ചിക്കു 
 പത്രോസിനെക്കുറിച്ചോർക്കുമ്പോഴൊക്കെ മനസിൽ തോന്നിയ ചിന്തയാണിത്. എന്നാലും ഈശോയെ പത്രോസ് തള്ളിപ്പറഞ്ഞുവല്ലോ. അതും മൂന്നു പ്രാവശ്യം! നാലു സുവിശേഷകർ മാത്രം പത്രോസ് ഈശോയെ തള്ളിപ്പറഞ്ഞതായി എടുത്തു പറയുന്നുണ്ട്. യോഹന്നാൻ  മയപ്പെടുത്തി പറയുന്നുവെന്നുമാത്രം. തന്നെക്കാൾ പ്രായക്കൂടുതൽ ഉള്ള പത്രോസിനോട് യോഹന്നാനുള്ള സ്‌നേഹവും ബഹുമാനവുമായിരിക്കാം കാരണം. മൂന്നുകൊല്ലം ഈശോ സ്‌നേഹിച്ചു വളർത്തിയ ശിഷ്യന്മാർ എല്ലാവരും യൂദന്മാർ ഈശോയെ പിടികൂടിയപ്പോഴും വലിച്ചിഴച്ചപ്പോഴും ഓടിപ്പോവുകയാണ് ചെയ്തത്. ഗുരുവിന് എന്താണ് സംഭവിക്കാൻ പോകുന്നതെന്നറിയാൻ വേണ്ടി യോഹന്നാനും പത്രോസും ഈശോയെ ദൂരത്തായി അനുഗമിച്ചു. പ്രധാന പുരോഹിതനെ പരിചയമുണ്ടായിരുന്നതുകൊണ്ട് യോഹന്നാൻ അകത്തു കയറി. പത്രോസ് വാതിൽക്കൽ നിന്നു. യോഹന്നാൻ തിരിച്ചു വന്ന് വാതിൽക്കൽ നിന്നിരുന്ന പരിചാരികയോടു സംസാരിച്ചതിനുശേഷം പത്രോസിനെയും അകത്തു കയറ്റി. പരിചാരിക പത്രോസിനോട് ചോദിച്ചു; 'നീയും ആ മനുഷ്യന്റെ ശിഷ്യന്മാരിൽ ഒരുവനല്ലോ?' 'അല്ല' എന്ന് പത്രോസ് മറുപടി പറഞഞു.

 നല്ല തണുപ്പിൽനിന്നു രക്ഷപ്പെടാൻവേണ്ടി ഭൃത്യനും സേവകനും തീ കായുകയായിരുന്നു. പത്രോസ് അവരുടെ കൂട്ടത്തിൽ കൂടി. അവർ അവനോടു ചോദിച്ചു, നീയും അവന്റെ ശിഷ്യന്മാരിൽ ഒരുവനല്ലേ? നിന്റെ സംസാരരീതി തന്നെ അതു തെളിയിക്കുന്നുണ്ട്. (ഗലീലിയക്കാരുടെ ശൈലിതന്നെ മറ്റുള്ളവരിൽ നിന്ന് വ്യത്യസ്തമായിരുന്നു. ഗ്രാമീണ ഭാഷയാണ് അവർ സംസാരിച്ചിരുന്നത്). പത്രോസാകട്ടെ, ഞാൻ ആ മനുഷ്യനെ അറിയുകയില്ലെന്ന് പറഞ്ഞ് ശപിക്കാനും ആണയിടാനും തുടങ്ങി. പ്രധാന പുരോഹിതന്റെ ഭൃത്യന്മാരിൽ ഒരുവനും പത്രോസ് ചെവി ഛേദിച്ചവന്റെ ചാർച്ചക്കാരിൽ ഒരുവനുമായ വൻ അവനോടു ചോദിച്ചു, 'ഞാൻ നിന്നെ അവനോടുകൂടെ തോട്ടത്തിൽ കണ്ടതല്ലേ?' പത്രോസ് വീണ്ടും ഈശോയെ തള്ളിപ്പറഞ്ഞു.

പത്രോസ് ആലോചനാപൂർവം തീരുമാനിച്ച ഒരു പ്രസ്താവനയായിരുന്നു അത്. ഉടനെ അതിനു മറുപടിയായി പരിഹാസസ്വരത്തിൽ ഒരു കൊച്ചുപൂവനും ഉച്ചത്തിൽ കൂവി.
എല്ലാവരുടെയും ചോദ്യങ്ങൾ പത്രോസിനെ ക്ഷുഭിതനാക്കി. തന്റെ പഴയ സ്വഭാവം പത്രോസ് പുറത്തെടുത്തു. ഈശോയെ ആദ്യം കണ്ട അവസരത്തിൽ പത്രോസ് സ്വയം പരിചയപ്പെടുത്തിയത് ഇങ്ങനെയാണ്: ''ഞാൻ നല്ലവനല്ല. അങ്ങയുടെ വാക്കുകൾ അനുസരിച്ച് ജീവിക്കാൻ എനിക്ക് സാധിക്കുകയില്ല. എന്നെ ആരെങ്കിലും ദ്രോഹിച്ചാൽ എനിക്ക് പെട്ടെന്ന് കോപം വരും. എനിക്ക് ധനമോഹമുണ്ട്. ചിലപ്പോഴെല്ലാം ഞാൻ മീൻ കച്ചവടത്തിൽ കാപട്യം കാണിച്ചിട്ടുണ്ട്.'' ആ കാപട്യം പത്രോസ് ഇവിടെയും എടുക്കുന്നുണ്ട്. മൂന്നുകൊല്ലം വിട്ടുപിരിയാതെ നടന്ന തന്റെ ഗുരുവിനെ ഏതാനും നിമിഷങ്ങൾക്കുള്ളിൽ പത്രോസ് തള്ളിപ്പറഞ്ഞു.

ഈശോ പത്രോസിനെ പന്ത്രണ്ടു പേരുടെയും തലവനാക്കിയത് മറ്റു ശിഷ്യന്മാർക്ക് ഇഷ്ടമായിരുന്നില്ല. പത്രോസിന്റെ അഭാവത്തിൽ ഒരിക്കൽ അവർ അതു സൂചിപ്പിക്കുകയും ചെയ്തു. ഈശോയുടെ മറുപടി ഇതായിരുന്നു: ''നിങ്ങൾ എല്ലാവരും അവനെ ബാഹ്യമായി കാണുന്നു. അതുകൊണ്ട് അവന്റെ കുറവുകൾ നിങ്ങൾ കാണുന്നു. ഞാൻ അവന്റെ ആത്മീയ ഗുണങ്ങൾ കാണുന്നു. പരിപൂർണനാകാൻ അവന് ഇനിയും ധാരാളം ചെയ്യാനും സഹിക്കാനുമുണ്ട്. അവനിലുള്ള സന്മനസ്, എളിമ, സാധുത്വം, സ്‌നേഹം ഇവയൊന്നും ഞാൻ നിങ്ങളിൽ കാണുന്നില്ല.
വാസ്തവത്തിൽ ഭീരുത്വം കൊണ്ടാണോ പത്രോസ് ഈശോയെ തള്ളിപ്പറഞ്ഞത്.? ഭീരുവായിരുന്നെങ്കിൽ ഈശോയെ പിടിക്കാൻ വന്ന അക്രമിസംഘത്തെയും ദേവാലയ കാവൽക്കാരെയും എതിർക്കുകയില്ലായിരുന്നു. ഈശോയെ രക്ഷിക്കാൻവേണ്ടി മാൽക്കൂസിനെ വെട്ടിമുറിവേൽപ്പിച്ചത് പത്രോസിന്റെ ജീവൻ തന്നെ അപകടത്തിലാക്കുന്ന പ്രവൃത്തിയായിരുന്നു.
എനിക്ക് തോന്നുന്നത് പത്രോസിന്റെ തലവിധിയായിരുന്നു ഇത് എന്നാണ്. പിൽക്കാലത്ത് ആരെല്ലാം അദ്ദേഹത്തെ ഇതിന്റെ പേരിൽ ആക്ഷേപിച്ചു കാണും!. എല്ലാം മൗനമായിനിന്നു കേൾക്കുകയല്ലാതെ മറുത്തു പറയാൻ വല്ല ന്യായവുമുണ്ടായിരുന്നോ!

കോഴിയുടെ കൂവൽ കേട്ടപ്പോൾ പത്രോസ് ഒന്നു ഞെട്ടി. ഗുരുവിന്റെ വാക്കുകൾ ഓർമയിൽ വന്നു. കോഴിയുടെ കൂവലും ഞെട്ടലും പത്രോസിനെ മരണംവരെ പിന്തുടർന്നു കാണും. പത്രോസ് ഓടിപ്പോകാൻ വേണ്ടി തിരിഞ്ഞപ്പോഴാണ് വിസ്താരം കഴിഞ്ഞ് മർദനങ്ങൾ ഏറ്റ് അവശനായി വരുന്ന ഈശോയെ കണ്ടത്. ഈശോ അതിരറ്റ സഹതാപത്തോടെ പത്രോസിനെ നോക്കി. ആഴമേറിയ ദുഃഖത്തോടുകൂടിയ ആ നോട്ടം അദ്ദേഹത്തിന്റെ മനസിൽ പതിഞ്ഞു.

തന്നോടുകൂടി സഹതപിക്കാൻ ആരെങ്കിലുമുണ്ടോ എന്ന പ്രത്യാശയോടെ തിരിഞ്ഞുനോക്കിയ ഈശോ കണ്ടത് തന്നെ  തള്ളിപ്പറഞ്ഞ പത്രോസിനെയായിരുന്നു. എത്രമാത്രം ആ മനസ് വേദനിച്ചുകാണും. പത്രോസ് തന്റെ മരണംവരെ അത് എല്ലാവരോടും ഏറ്റുപറയുകയും വിലപിക്കുകയും ചെയ്തിരുന്നു. അതിനുശേഷം പത്രോസ് ജീവനുള്ള ഈശോയെ കണ്ടിട്ടില്ല.
സാവൂൾ മാനസാന്തരപ്പെട്ട ആദ്യകാലത്ത് ജറുസലേമിൽ വന്ന് പത്രോസിന്റെ കൂടെ 15 ദിവസം താമസിച്ചു. ആ സമയത്ത് പത്രോസ് പൗലോസിനോട് ഈശോയെക്കുറിച്ച് വിശദമായി പറയുകയും ഈശോ നടന്ന വഴികളിൽക്കൂടി കൊണ്ടുപോകുകയും ചെയ്തതായി ചരിത്രകാരനായ റിച്ചിയോത്തി തന്റെ 'പൗലോസ് അപ്പസ്‌തോലൻ' എന്ന ഗ്രന്ഥത്തിൽ വിവരിക്കുന്നുണ്ട്. വികാരത്തോടും കുറ്റബോധത്തോടും കൂടിയായിരുന്നു പത്രോസിന്റെ ഏറ്റുപറച്ചിൽ.

നഗരത്തിന്റെ വലതുഭാഗത്തെ മതിലിന് അപ്പുറത്ത് എത്തിയപ്പോൾ നഗരത്തിന് തൊട്ടടുത്തുള്ള പാറക്കെട്ടു നിറഞ്ഞ ഒരു കുന്ന് ചൂണ്ടിക്കാണിച്ചുകൊണ്ട് പറഞ്ഞു; 'അതാണ് ഗാഗുൽത്താ.' അനന്തരം സാവകാശം അപരിമേയമായ ദുഃഖത്തോടെ ആത്മഗതമെന്നോണം പറഞ്ഞു 'അവിടുത്തെ അമ്മ അവിടെ ഉണ്ടായിരുന്നു. യോഹന്നാനും- ഞാൻ അവിടെ ഇല്ലായിരുന്നു.' 'ഞാൻ അവിടെയില്ലായിരുന്നു' എന്ന കൊച്ചുവാക്യത്തിൽ അദ്ദേഹത്തിന്റെ ഹൃദയവ്യഥയും' കുറ്റബോധവും വളരെ ആഴമായി പതിഞ്ഞിട്ടുണ്ട്.

ഞാൻ പടിവാതിലിലൂടെയും മുറ്റത്തുകൂടിയും അങ്ങോട്ടുമിങ്ങോട്ടും നടക്കുകയായിരുന്നു. സോദരാ, പൗലോസേ, മൂന്നു പ്രാവശ്യം ഒന്നല്ല, രണ്ടല്ല, മൂന്നു പ്രാവശ്യം അവിടുത്തെ അറിയുകയില്ലെന്ന് ഞാൻ പറഞ്ഞു. അവിടുന്ന് മുൻകൂട്ടി പറഞ്ഞതുപോലെ കോഴി കൂവി. അരമനയിൽനിന്ന് വരുന്ന വഴിക്ക് അദ്ദേഹം എന്നെ ഒന്നു നോക്കി. അപ്പോൾ അതു മാത്രമേ അദ്ദേഹത്തിന് കഴിയുമായിരുന്നുള്ളൂ. ഒരു വാക്കുപോലും അവിടുന്ന് ഉരിയാടിയില്ല. പക്ഷേ, എനിക്ക് ആ നോട്ടം സഹിക്കാവുന്നതായിരുന്നില്ല. ഞാൻ ആകപ്പാടെ തകർന്നിരുന്നു. ഒരു വിധം ഞാൻ പുറത്തുകടന്നു. ഭിത്തിയുടെ ഈ മൂലയിൽ തല ചാരിനിന്ന് ഞാൻ പൊട്ടിക്കരഞ്ഞു, ആ രാത്രി മുഴുവൻ കരഞ്ഞു. കോഴി കൂവുന്നത് കേൾക്കുമ്പോൾ എല്ലാ രാത്രിയിലും ഞാൻ എത്രമാത്രം കരയുമായിരുന്നുവെന്നോ. പൗലോസ് ആശ്വസിപ്പിച്ചു. സഹോദരാ, ഞാൻ അതിലും വലിയ ദ്രോഹം ചെയ്തവനല്ലേ. അദ്ദേഹം നമ്മളോടു ക്ഷമിച്ചില്ലേ?. ചെയ്തുപോയ തെറ്റിനെയോർത്ത് പത്രോസ് ദുഃഖിച്ചു. എന്നാലും ലോകാവസാനം വരെ പാപികളായ നമ്മൾ പറയും ''എന്നാലും പത്രോസ് മൂന്നു പ്രാവശ്യം ഈശോയെ തള്ളിപ്പറഞ്ഞുവല്ലോ എന്ന്.''
വിശുദ്ധ നാട്ടിൽ പത്രോസിന്റെ നാമധേയത്തിലുള്ള ഒരു പള്ളിയുടെ മുമ്പിൽ ദീർഘകായകനായ പത്രോസിന്റെ ഒരു പ്രതിമയും തൊട്ടടുത്തു നിൽക്കുന്ന പരിഹാസകനായ ഒരു പൂവൻകോഴിയെയും കാണാം.  മഹാനായ ഏതോ ഒരു ചിത്രകാരന്റെ കൈവിരുതിൽ, ആകുലചിത്തനായി നിൽക്കുന്ന പത്രോസ് നമ്മുടെ ഹൃദയത്തിൽ  മായാതെ നിൽക്കും.
പത്രോസ് ജീവിതത്തിൽ മൂന്നുതവണ മാത്രമേ ഈശോയെ തള്ളിപ്പറഞ്ഞിട്ടുള്ളൂ. പക്ഷേ നാം ജീവിതത്തിൽ എത്ര തവണ എങ്ങനെയെല്ലാം ഈശോയെ തള്ളിപ്പറഞ്ഞിട്ടുണ്ട് എന്ന് ചിന്തിക്കുന്നത് നന്നായിരിക്കും.