ആത്മീയജീവിതം പരാജയപ്പെടുന്നതിന്റെ കാരണങ്ങൾ  

Shalom Times, 05 June 2013 
Written by  കെ. ജെ. മാത്യു 

തക്കസമയത്ത് ജീവിതത്തിൽ ഇടപെടാൻ ആഗ്രഹിക്കുന്നവനും സാധിക്കുന്നവനുമായ ഒരു ദൈവം ഉണ്ടെന്നതാണ് നമ്മുടെ പ്രത്യാശ. വിളിച്ചപേക്ഷിക്കുന്നവർക്ക് സമീപസ്ഥനായ അവിടുന്ന് നിർണായകമായ നിമിഷങ്ങളിൽ നമുക്കുവേണ്ടി ഇടപെടും. കാരണം, അവിടുന്ന് നമ്മോടുകൂടെയുള്ള ദൈവം (ഇമ്മാനുവേൽ) ആണ്. ദൈവം തക്കസമയത്ത് ഇടപെട്ട ഒരു അനുഭവം പങ്കുവയ്ക്കട്ടെ.

1980-ൽ ഞാൻ ഹൈദരാബാദിൽ എത്തിച്ചേർന്നു. പ്രീഡിഗ്രി കഴിഞ്ഞ് മൂന്നു വർഷങ്ങളുടെ ഇടവേള ഉണ്ടെങ്കിൽ ഡിഗ്രി പരീക്ഷകൾ ഒരുമിച്ച് ഒറ്റ വർഷംകൊണ്ട് എഴുതിയെടുക്കാനുള്ള അവസരം അവിടെയുള്ള ഒസ്മാനിയ യൂണിവേഴ്‌സിറ്റിയിൽ ഉണ്ടെന്നറിഞ്ഞാണ് അവിടെ പോയത്. പരീക്ഷയ്ക്ക് രജിസ്റ്റർ ചെയ്യുവാനുള്ള അവസാനത്തെ ദിവസമാണ് ഞാൻ യൂണിവേഴ്‌സിറ്റി ഓഫീസിൽ എത്തുന്നത്. സമയം ഏകദേശം നാലുമണി. അപേക്ഷാർത്ഥികളുടെ നിരയിൽ നില്ക്കുകയാണ് ഞാൻ. അവസാനം എന്റെ ഊഴം വന്നു. രേഖകൾ പരിശോധിച്ച ഉദ്യോഗസ്ഥൻ എന്നെ ഞെട്ടിപ്പിച്ച കാര്യമാണ് പറഞ്ഞത്. അപേക്ഷ സ്വീകരിക്കുവാൻ സാധ്യമല്ല, കാരണം മൈഗ്രേഷൻ സർട്ടിഫിക്കറ്റ് സമർപ്പിച്ചിട്ടില്ല (ഒരു യൂണിവേഴ്‌സിറ്റിയിൽനിന്നും മാറി മറ്റൊരു യൂണിവേഴ്‌സിറ്റിയിൽ കോഴ്‌സിനായി ചേരുമ്പോൾ അത്യാവശ്യമായി സമർപ്പിക്കേണ്ടതാണ് മൈഗ്രേഷൻ സർട്ടിഫിക്കറ്റ്). പക്ഷേ, അന്ന് അതിനെക്കുറിച്ച് എനിക്ക് അറിയുമായിരുന്നില്ല. ഉദ്യോഗസ്ഥൻ ഇത് പറഞ്ഞപ്പോൾ ഞാൻ വളരെ വിഷമിച്ചു. ഈ പരീക്ഷ എഴുതിയില്ലെങ്കിൽ ഇനിയും മൂന്നു വർഷങ്ങൾ ചെലവഴിക്കേണ്ടിവരും ഒരു ബിരുദം നേടുവാൻ.

ഓർമയിൽ നിന്നും മായാത്ത കറുത്ത മഷി
ഞാൻ മാറിയിരുന്ന് പ്രാർത്ഥിച്ചു. അപ്പോൾ പരിശുദ്ധാത്മാവ്, എന്റെ സഹായത്തിനായി വന്നു. മനസിൽ ഒരു ചിന്ത നല്കി: പരീക്ഷയുടെ ചുമതലയുള്ള ഡപ്യൂട്ടി രജിസ്ട്രാറെ പോയിക്കാണുക. എന്റെ കൈയിൽ നിരസിക്കപ്പെട്ട രേഖകൾ മാത്രമേയുള്ളൂ എന്നോർക്കണം. പക്ഷേ, ദൈവത്തിന് വേണമെങ്കിൽ ആ അഞ്ചപ്പത്തെ ആശീർവദിക്കുവാൻ സാധിക്കുമല്ലോ. ഇതായിരുന്നു എന്റെ പ്രത്യാശ. ഞാൻ ഡപ്യൂട്ടി രജിസ്ട്രാറെ കണ്ടു. ബുദ്ധിമുട്ടുകൾ അദ്ദേഹത്തോട് പറഞ്ഞു. ''യൂണിവേഴ്‌സിറ്റി നിയമമാണ് മൈഗ്രേഷൻ സർട്ടിഫിക്കറ്റ് വേണമെന്നുള്ളത്. എനിക്ക് ഇക്കാര്യത്തിൽ ഒന്നും ചെയ്യുവാൻ സാധിക്കുകയില്ല.'' അദ്ദേഹം നിസഹായനായി കൈമലർത്തി. അപ്പോൾ എന്റെ കൂടെയുള്ള പരിശുദ്ധാത്മാവ് മറ്റൊരു പ്രചോദനം നല്കി. എന്റെ പ്രീഡിഗ്രിയുടെ മാർക്ക് ലിസ്റ്റ് അദ്ദേഹത്തെ കാണിക്കുക. ഞാൻ അനുസരിച്ചു. എന്റെ കൈ ഞാനറിയാതെ മൊത്തം മാർക്കിലേക്ക് നീങ്ങി. എന്നിട്ട് അപേക്ഷാസ്വരത്തിൽ പറഞ്ഞു: സർ, എനിക്ക് ഫസ്റ്റ് ക്ലാസുണ്ട്. പരിശുദ്ധാത്മാവിനെ അനുസരിച്ച് ഇതു ചെയ്തപ്പോൾ അവിടുന്ന് ആ ഉദ്യോഗസ്ഥനെ സ്പർശിച്ചു. ഉടനെ അദ്ദേഹം എന്റെ ടി.സിയിൽ ഇപ്രകാരം എഴുതി:  ഠീ യല മരരലുലേറ മ െങ.ഇ. ശി വേല എശഹല (മൈഗ്രേഷൻ സർട്ടിഫിക്കറ്റിനു പകരം ഇത് ഫയലിൽ സ്വീകരിക്കുക). എഴുതിയത് കറുത്ത മഷിയിലാണ്. ആ വാക്കുകൾ മുപ്പത്തിരണ്ട് വർഷങ്ങൾക്കുശേഷവും ഞാൻ വ്യക്തമായി ഓർക്കുന്നു. കാരണം, എന്റെ ജീവിതത്തെ വ്യക്തമായി സ്വാധീനിച്ച ഒന്നായിരുന്നല്ലോ അത്.

ബുദ്ധിയിലെ മൂടൽമഞ്ഞുകൾ
അതാണ് നമ്മുടെ ദൈവം. ഇത് വായിക്കുന്ന നിങ്ങൾക്ക് ഒരു സംശയം തോന്നാം. എന്തുകൊണ്ടാണ് ദൈവം ഇമ്മാനുവേൽ ആയിട്ടും അവിടുത്തെ തിരിച്ചറിയുവാൻ എനിക്ക് സാധിക്കാത്തത്? ഇതിന് മറുപടിയായി ഒരു തിരുവചനം നിങ്ങളുടെ ശ്രദ്ധയിൽപ്പെടുത്തട്ടെ. ''അവർ സംസാരിക്കുകയും വാദിക്കുകയും ചെയ്തുകൊണ്ടുപോകുമ്പോൾ യേശുവും അടുത്തെത്തി അവരോടൊപ്പം യാത്ര ചെയ്തു. എന്നാൽ, അവനെ തിരിച്ചറിയാൻ കഴിയാത്തവിധം അവരുടെ കണ്ണുകൾ മൂടപ്പെട്ടിരുന്നു'' (ലൂക്കാ 24:16). യേശു കൂടെ നടക്കുന്നുണ്ട്. ഇതുതന്നെയല്ലേ നമ്മുടെ പ്രശ്‌നവും! ദൈവം കൂടെയുണ്ട്. എന്നാൽ, തിരിച്ചറിയാൻ പറ്റുന്നില്ല. അതിനാൽ നാം നിസഹായരും നിരാശരുമായി ജീവിതയാത്ര തുടരുന്നു. അതിനാൽ സന്തോഷകരമായ ഒരു ജീവിതത്തിന് യേശുവിന്റെ സാന്നിധ്യം തിരിച്ചറിഞ്ഞേ മതിയാകൂ. എന്താണതിന്റെ വഴി?

കാരണമായി വിശുദ്ധ ഗ്രന്ഥം ചൂണ്ടിക്കാട്ടുന്നത് കണ്ണുകൾ മൂടപ്പെട്ട അവസ്ഥയാണ്. നമുക്കും ഇത് സംഭവിക്കാം- മൂന്ന് തലങ്ങളിൽ.
ഒന്നാമത്തെ തലം ബുദ്ധിയുടെ മേഖലയിലാണ്. ദൈവം കഴിഞ്ഞ കാലങ്ങളിൽ നടത്തിയ അനേക ഇടപെടലുകൾ  കണ്ടിട്ടുണ്ട്. പക്ഷേ, ഒരു പ്രശ്‌നം വരുമ്പോൾ നാം ബുദ്ധികൊണ്ട് വിശകലനം ചെയ്യുന്നു. ദൈവത്തിന്റെ ശക്തിയെ പരിമിതപ്പെടുത്തുന്ന വിധത്തിൽ ചിന്തിക്കുന്നു. ബുദ്ധികൊണ്ട് ദൈവത്തെ അളക്കാൻ ശ്രമിക്കുന്ന ഒരു വ്യക്തിക്ക് ഒരിക്കലും ദൈവത്തിന്റെ ഇടപെടലുകൾ കാണുവാൻ സാധിക്കുകയില്ല. ശിശുവിന്റെ മനോഭാവത്തോടെ പൂർണമായും യേശുവിൽ ശരണപ്പെടുക. ബുദ്ധിയുടെ മൂടൽമഞ്ഞ് അവിടുന്ന് എടുത്തുമാറ്റും.

മനസിന്റെ മൂടുപടങ്ങൾ
രണ്ടാമത്തെ തലം മനസിന്റെ മൂടലാണ്. ജീവിതത്തിലെ കണ്ണീരിന്റെ അനുഭവങ്ങൾ, ഏറ്റുവാങ്ങിയ പരിഹാസങ്ങൾ, അപമാനങ്ങൾ ഇതെല്ലാം മനസിനെ മൂടുന്ന മൂടൽമഞ്ഞായി നില്ക്കുന്നു. കഴിഞ്ഞ നാളുകളിലെ ഓരോ ദുഃഖാനുഭവങ്ങളും എണ്ണിപ്പെറുക്കി നീയും ഇപ്പോൾ പിറുപിറുത്തുകൊണ്ടിരിക്കുന്നു. യേശു അവർക്ക് വചനം വ്യാഖ്യാനിച്ചുകൊടുത്തു. എന്നാലും അവർക്ക് മാറ്റമില്ല. ഇതുപോലെ നീയും ഇപ്പോൾ വചനം വായിക്കുന്നു, പ്രാർത്ഥനാഗ്രൂപ്പിൽ പോകുന്നു, ധ്യാനങ്ങൾ കൂടുന്നു. പക്ഷേ, ഇപ്പോഴും കണ്ണുകൾ തുറക്കപ്പെടുന്നില്ല. ഇതിന് എന്താണ് പരിഹാരം? കണ്ണീരോടെ പ്രാർത്ഥിക്കുക. എമ്മാവൂസിലേക്ക് പോയ ശിഷ്യന്മാർ യേശുവിനെ തിരിച്ചറിഞ്ഞത് അവിടുന്ന് അപ്പം എടുത്ത് ആശീർവദിച്ച്, മുറിച്ച് അവർക്ക് കൊടുത്തപ്പോഴാണ്. ഇതും ഇന്നും സംഭവിക്കുന്നുണ്ട് ഓരോ വിശുദ്ധ കുർബാനയിലും. വൈദികൻ വിശുദ്ധ കുർബാന എടുത്ത് ഉയർത്തുമ്പോൾ യേശുവിനെ വിളിച്ച് പ്രാർത്ഥിക്കുക: അവിടുന്ന് നിശ്ചയമായും നിന്നെ സ്പർശിക്കും.

ആത്മീയ അഹങ്കാരം
യേശുവിന്റെ സാന്നിധ്യം നമ്മുടെ ജീവിതത്തിൽ മറയ്ക്കുന്ന മൂന്നാമത്തെ മേഖല ആത്മാവിന്റെ തലമാണ്. പാപത്തിന്റെ അന്ധകാരം ആത്മാവിനെ മൂടുമ്പോൾ ദൈവത്തെ അനുഭവിച്ചറിയുവാൻ സാധിക്കുകയില്ല. അതുകൊണ്ടാണ് പാപിക്ക് സ്‌തോത്രഗീതം ഇണങ്ങുകയില്ലെന്ന് പറയപ്പെടുന്നത്. ചെയ്തുപോയ പാപങ്ങളോർത്തുള്ള നിരന്തരമായ ഒരു അനുതാപം ദൈവത്തിന്റെ ഒരു സഹയാത്രികന് അത്യാവശ്യമത്രേ. ഈ അനുതാപവും കഴുകപ്പെടലും ഇല്ലെങ്കിൽ ആത്മാവ് കഠിനമായിത്തീരും, ഫരിസേയന്മാരുടേതുപോലെ. ഒരു സ്വയം ന്യായീകരണത്തിലേക്ക് അവർ പെട്ടെന്ന് വഴുതിവീഴും. ഇന്ന് ആത്മീയജീവിതം നയിക്കുന്ന അനേകർക്ക് സംഭവിക്കുന്ന ഒരു ദുര്യോഗമാണിത്. അതിനാൽ ഏറ്റവും ചെറിയ പാപങ്ങളെപ്പോലും തിരിച്ചറിയുവാനുള്ള കൃപയ്ക്കായി പ്രാർത്ഥിക്കണം. പ്രത്യേകിച്ച് വെറുപ്പിന്റെ പല ഭാവങ്ങൾ നമ്മുടെ ആത്മാവിലുള്ളത് തിരിച്ചറിയണം. അല്ലെങ്കിൽ സഹോദരനോട് സംസാരിക്കുവാൻ സാധിക്കാത്തപ്പോഴും, ആത്മാർത്ഥമായി ക്ഷമിക്കുവാൻ സാധിക്കാത്തപ്പോഴും തനിക്കൊരു കുറവുമില്ല എന്ന രീതിയിൽ മുന്നോട്ടുപോകും. കുഞ്ഞാടിന്റെ വേഷത്തിൽ ചെന്നായ് നടക്കുന്നതുപോലെയാണിത്. അതിനാൽ ദൈവസന്നിധിയിൽ മുഖംമൂടിയില്ലാതെ കടന്നുവരിക. താഴുവാൻ തയാറാകുമ്പോൾ ദൈവകൃപ സമൃദ്ധമായി ഒഴുകിയിറങ്ങും.
അതിനാൽ നമുക്ക് ജാഗ്രതയുള്ളവരായിരിക്കാം. നമ്മുടെ ജീവിതമാകുന്ന മുന്തിരിത്തോപ്പിനെ നശിപ്പിക്കുന്ന ചെറുകുറുക്കന്മാരെ പിടികൂടുക. ദൈവികസാന്നിധ്യംകൊണ്ട് നമ്മുടെ ജീവിതം പൂത്തുലയും. വചനം ഇപ്രകാരം സാക്ഷ്യപ്പെടുത്തുന്നു: ''മുന്തിരിത്തോട്ടം നശിപ്പിക്കുന്ന കുറുക്കന്മാരെ, ആ ചെറുകുറുക്കന്മാരെ പിടികൂടുക. നമ്മുടെ മുന്തിരിത്തോപ്പ് പൂത്തുലയുന്നു'' (ഉത്തമഗീതം 2:15). കൃപയ്ക്കായി നമുക്ക് പ്രാർത്ഥിക്കാം.

സ്‌നേഹനിധിയായ എന്റെ യേശുവേ, അവിടുന്ന് ഇമ്മാനുവേൽ ആണെന്ന് പലപ്പോഴും എനിക്ക് തിരിച്ചറിയാൻ സാധിക്കുന്നില്ല. പലവിധത്തിൽ എന്റെ കാഴ്ച മങ്ങിപ്പോയിരിക്കുന്നു. എനിക്ക് എന്നെത്തന്നെ കണ്ടെത്തുവാൻ സാധിക്കുന്നില്ല. അങ്ങയുടെ പരിശുദ്ധാത്മാവിന്റെ വെളിച്ചത്താൽ എന്റെ ഇരുണ്ട ജീവിതത്തെ പ്രകാശിപ്പിക്കണമേ. അങ്ങെന്നെ കാണുന്നതുപോലെ ഞാൻ എന്നെത്തന്നെ കാണുവാൻ കൃപ നല്കിയാലും. സകല മായക്കാഴ്ചകളിൽനിന്നും എനിക്ക് മോചനം നല്കണമേ. എന്റെ മുന്തിരിത്തോപ്പ് പൂത്തുലയുവാൻ എന്റെ ജീവിതത്തിന്റെമേൽ അങ്ങയുടെ അനുഗ്രഹത്തിന്റെ കരങ്ങൾ നീട്ടണമേ. ഞാൻ അങ്ങയെ കാണട്ടെ. അങ്ങയെ ദർശിച്ച് അങ്ങേക്കായി ജീവിക്കുവാൻ എന്നെ അനുഗ്രഹിച്ചാലും. പരിശുദ്ധ അമ്മേ, വിശുദ്ധ യൗസേപ്പിതാവേ, യഥാർത്ഥ ദർശനം-യേശുദർശനം ലഭിക്കുവാൻ എനിക്കായി പ്രാർത്ഥിക്കണമേ. ആമ്മേൻ